चुनावमा भयरहित ढङ्गले मताधिकार प्रयोग गर्ने वातावरण बनाउन सरकार प्रतिवद्ध : प्रधानमन्त्री कार्की

काठमाडौं, ५ कात्तिक । प्रधानमन्त्री सुशीला कार्कीले आउँदो फागुन २१ गते हुने चुनावमा भयरहित ढङ्गले मताधिकार प्रयोग गर्ने वातावरण बनाउन सरकार प्रतिवद्ध रहेको बताउनुभएको छ । आज बिहान ललितपुर महानगरपालिकाले आयोजना गरेको नेपाल संवत ११४६ न्हुँद समारोह समितिको कार्यक्रमलाई सम्बोधन गर्दै उहाँले लोकतान्त्रिक सबलीकरण, आर्थिक समृद्धि र नागरिक अधिकारको रक्षा गर्नुपर्ने दायित्व पनि अहिलेको सरकारसँग रहेको उल्लेख गर्नुभयो । चुनाव सम्पन्न गराउन सबै राजनीति दल, वर्ग, समूहको साथ र सहयोग रहनेछ भन्नेमा विश्वस्त रहेको प्रधानमन्त्री कार्कीले बताउनुभयो ।
गएको भदौ २३ र २४ मा जेन–जीले गरेको आन्दोलनबाट बनेको वर्तमान सरकारलाई फागुन २१ मा चुनाव गराउने मुख्य जिम्मेवारी रहेको भन्दै उहाँले नेपालको संविधानमा रही जेन–जी आन्दोलनले उठाएको सुशासनको आवाजलाई सम्बोधन गर्नुपर्ने दायित्व पनि रहेको बताउनुभयो । यसका लागि समाजका सबै तह, तप्का र वर्ग समुदायको उत्तिकै भूमिका हुने उहाँको भनाइ छ । प्रधानमन्त्री कार्कीले नेपाल संवत् नेपाली गौरव, सभ्यता र परोपकारको प्रतीक भएको बताउनुभयो ।