शिक्षिका मृत्यु प्रकरण: सरकारी वकिल नहुँदा बयान सर्‍यो

धनगढी । डोटीमा शिक्षिका मृत्यु प्रकरणमा शुक्रवार प्रतिवादीको बयान लिने तयारी गरिए पनि सरकारी वकिल नहुँदा रोकिएको छ। जिल्लामा सरकारी वकिल नहुँदा बयान कार्तिक १७ गतेसम्मका लागि सरेको हो। जिल्ला प्रहरी कार्यालय डोटीका प्रहरी निरीक्षक रामचन्द्र जोशीका अनुसार शुक्रवारदेखि प्रतिवादीको बयान लिने प्रक्रिया अगाडि बढाउने भनिए पनि सरकारी वकिल जिल्लामा नहुँदा उक्त काम पछि सरेको हो।

‘प्रतिवादीको बयान हिजो लिने भनिएको भए पनि सरकारी वकिल हुनुभएन, त्यसैले अव १७ गते बयान लिने तयारी छ, अहिले प्रहरीले आफ्नो निकायले हुने काम गरिरहेको छ, वकिल जिल्लाबाहिर हुँदा बयान लिने काम सरेको हो, वकिल आउनुभएपछि बयानको काम हुन्छ’ उनले भने।

कात्तिक १० गते पूर्वीचौकी गाउँपालिका–१ निवासी २७ वर्षीय शिक्षिका जानकी खड्का घर नजिकैको रुखमा झुन्डिएको अवस्थामा मृत फेला परेकी थिइन् । बाजुराको बुढीगंगा नगरपालिका–५ स्थित भानोदय माध्यमिक विद्यालयमा गणित शिक्षकका रूपमा कार्यरत जानकी कैलाली बहुमुखी क्याम्पसमा स्नातकोत्तर तहको चौथो सेमेस्टरमा अध्ययनरत थिइन् ।

जानकीले मृत्युअघि लेखेको पत्रमा जिल्ला शिक्षा समन्वय एकाइ डोटीका शिक्षा अधिकृत तथा विद्यालय निरीक्षक गणेशबहादुर रावलले आफूलाई विवाहका लागि निरन्तर दबाब दिएको खुलासा गरेकी छन् । रावलले सामाजिक सञ्जाल फेसबुकमार्फत आफूसँग मित्रता गाँसेर लगातार मानसिक तनाव दिन थालेको जानकीको सो पत्रमा उल्लेख छ ।

विवाहको प्रस्ताव अस्वीकार गरेपछि रावलले जानकीका भाइ प्रदीपलाई फोन गरेर ‘तिम्रो दिदीले मसँग विवाह नगरे मारिदिन्छु’ भन्दै धम्की दिएको कुराले जानकी थप त्रसित बनेको पत्रबाट खुल्न आएको छ। घटनापछि मृतक परिवारको जाहेरीका आधारमा गणेश रावल प्रहरी हिरासतमा छन्।