सुनसरीको देवानगञ्ज बजारमा झडप

काठमाडौं, १२ साउन । सुनसरीको देवानगञ्ज बजारमा मंगलबार राति पुनः दुई समूहबीच झडप भएको छ। आइतबारदेखि तनावग्रस्त बनेको क्षेत्र फेरि अशान्त बनेपछि सुरक्षा निकायलाई अवस्था नियन्त्रणमा लिन कठिन भएको छ।

देवानगञ्ज गाउँपालिका–३ स्थित बजार क्षेत्रमा राति करिब ८ बजेदेखि दुई पक्षबीच झडप सुरु भएको प्रहरीले जनाएको छ। घटनास्थलमा खटिएका सुरक्षाकर्मीका अनुसार दुवै पक्ष घरेलु हतियारसहित बजारमा उत्रिएपछि स्थिति थप तनावपूर्ण बनेको हो।

झडप नियन्त्रणका लागि नेपाल प्रहरी र अन्य सुरक्षा निकाय परिचालन गरिएको छ। सुनसरी प्रहरीका सूचना अधिकारी प्रहरी नायब उपरीक्षक (डीएसपी) चन्द्रबहादुर खड्काले अवस्था नियन्त्रणमा लिन प्रयास भइरहेको जानकारी दिनुभयो।

यसअघि आइतबार रातिको झडपमा एक जनाको मृत्यु भएको थियो भने त्यसयता देवानगञ्ज क्षेत्रमा कर्फ्यु, अतिरिक्त सुरक्षा परिचालन र उच्च सतर्कता कायम गरिएको छ। पछिल्लो झडपपछि स्थानीय प्रशासनले सुरक्षा व्यवस्था अझ कडा बनाएको छ।