काठमाडौं, १७ साउन । भारतबाट पेट्रोलियम पदार्थको नयाँ मूल्य बढेर आएपछि नेपालमा पनि इन्धनको मूल्य बढ्ने संकेत देखिएको छ। नेपाल आयल निगमले भने सञ्चालक समितिको निर्णयपछि मात्रै नयाँ मूल्यसूची सार्वजनिक गर्ने जनाएको छ।
निगमले सामान्यतया प्रत्येक अङ्ग्रेजी महिनाको १ र १६ तारिखमा इन्धनको मूल्य समायोजन गर्दै आएको छ। इन्डियन आयल कर्पोरेसन (आईओसी) बाट प्राप्त नयाँ मूल्यका आधारमा मूल्य निर्धारण गरिने भए पनि यसपटक प्राप्त मूल्यमा ठूलो परिवर्तन भएकाले सञ्चालक समितिको निर्णय आवश्यक परेको निगमले जनाएको छ।
निगमका प्रवक्ता मनोजकुमार ठाकुरका अनुसार स्वचालित मूल्य प्रणालीअनुसार दुई रुपैयाँसम्मको मूल्य समायोजन व्यवस्थापन तहबाट गर्न सकिने भए पनि त्योभन्दा बढी हेरफेरका लागि सञ्चालक समितिको स्वीकृति आवश्यक हुन्छ।
निगम स्रोतका अनुसार अन्तर्राष्ट्रिय बजारमा कच्चा तेलको मूल्य बढेसँगै आईओसीबाट पेट्रोलियम पदार्थको मूल्य दोहोरो अङ्कले वृद्धि भएर आएको छ। शनिबार र आइतबार सार्वजनिक बिदा परेकाले सञ्चालक समितिको बैठक बस्न ढिलाइ भएको र बैठकको निर्णयपछि मात्रै नयाँ मूल्य कार्यान्वयनमा आउने जनाइएको छ।
भारतबाट मूल्य बढेर आएकाले नेपालमा पनि पेट्रोल, डिजेल र मट्टितेलको मूल्य बढ्ने सम्भावना रहेको छ। यद्यपि, नयाँ मूल्य कहिलेदेखि लागू हुने भन्नेबारे निगमले औपचारिक निर्णय सार्वजनिक गरिसकेको छैन।
प्रतिक्रिया