काठमाडौँ, १६ वैशाख । राष्ट्रिय स्वतन्त्र पार्टी (रास्वपा)का प्रतिनिधिसभा सदस्य गणेश कार्कीले आफ्नै दल नेतृत्वको सरकारको अध्यादेश निर्णयप्रति सार्वजनिक रूपमा आलोचना गर्नुभएको छ।
संसद् अधिवेशन स्थगित गरी अध्यादेश ल्याइएको विषयमा प्रतिक्रिया दिँदै उहाँले झण्डै दुई तिहाइ समर्थन भएको सरकारले यस्तो बाटो रोज्नु “बहादुरी नभएको” टिप्पणी गर्नुभयो। “अधिवेशन रोकेर अध्यादेश ल्याउनु पर्ने अवस्था ‘बाध्यता’ हो कि अन्य कारण, त्यो पछि स्पष्ट होला, तर यो बहादुरी भने होइन,” उहाँको भनाइ उद्धृत गरिएको छ।
उहाँले अध्यादेश ल्याउने संवैधानिक अधिकार रहेको स्वीकार गर्दै पनि यसपटक संविधानको मर्मअनुसार व्यवहार नभएको धारणा व्यक्त गर्नुभयो। “संविधान अक्षरमा मात्रै होइन, यसको मर्ममा आधारित भएर चल्नुपर्छ,” उहाँले भन्नुभयो।
कार्कीले विगतमा विपक्षमा रहँदा उठाएका प्रश्नहरू अहिले आफ्नै सरकारका सन्दर्भमा पनि उठाइरहेको उल्लेख गर्दै सिद्धान्तमा सम्झौता नगर्ने संकेत दिनुभएको छ।
उहाँको अभिव्यक्तिलाई सरकारभित्रैबाट आएको असन्तुष्टिको संकेतका रूपमा हेरिएको छ।
प्रतिक्रिया