काठमाडौं, १० साउन । नेपालको पहिलो आधुनिक सडक सुरुङमार्ग नागढुंगा–सिस्नेखोला सुरुङमार्ग सोमबार औपचारिक रूपमा उद्घाटन हुने भएको छ। उद्घाटनसँगै प्रारम्भिक चरणमा एम्बुलेन्स, दमकल तथा सुरक्षा निकायका आकस्मिक सवारी साधनलाई मात्र सञ्चालन अनुमति दिइने भएको छ।
जापान अन्तर्राष्ट्रिय सहयोग नियोग (जाइका) को सहुलियतपूर्ण ऋण र नेपाल सरकारको संयुक्त लगानीमा करिब १९ अर्ब रुपैयाँ लागतमा निर्माण सम्पन्न भएको यस आयोजनाको मुख्य सुरुङको लम्बाइ २.६८ किलोमिटर रहेको सडक विभागले जनाएको छ।
विभागका अनुसार उद्घाटनपछि सुरुङभित्र सम्भावित दुर्घटना तथा आगलागी व्यवस्थापनका लागि ‘मक ड्रिल’ सञ्चालन गरिनेछ। त्यसपछि प्राविधिक परीक्षण पूरा गरी एकतर्फी परीक्षण सञ्चालन गरिने र करिब एक महिनाभित्र सर्वसाधारणका लागि पूर्ण रूपमा खुला गर्ने तयारी छ।
सुरुङमार्गमा मोटरसाइकल तथा प्रज्वलनशील वा विस्फोटक पदार्थ बोकेका सवारी साधनलाई भने सञ्चालन गर्न निषेध गरिएको छ।
नागढुंगाको जोखिमपूर्ण उकालो र पहिरो प्रभावित सडकको विकल्पका रूपमा निर्माण भएको यो सुरुङमार्गले काठमाडौं–नौबिसे यात्रालाई सुरक्षित, सहज र छिटो बनाउने अपेक्षा गरिएको छ।
प्रतिक्रिया