काठमाडौं, ७ साउन । नेकपा (एमाले)का अध्यक्ष केपी शर्मा ओलीले प्रदेश सरकारको राजनीतिक समीकरणबारे देखिएको अन्योल छिट्टै अन्त्य हुने बताउनुभएको छ।
नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४८औँ स्मृति दिवसका अवसरमा काठमाडौंमा आयोजित कार्यक्रममा सम्बोधन गर्दै अध्यक्ष ओलीले प्रदेश सरकार सञ्चालनमा देखिएको अस्पष्टता चाँडै हटाइने र सरकारहरू स्पष्ट ढंगले अघि बढ्ने बताउनुभयो।
उहाँले प्रदेश तथा स्थानीय सरकारलाई प्रभावकारी रूपमा सञ्चालन गर्ने वातावरण निर्माण गरिने उल्लेख गर्दै वर्तमान राजनीतिक अन्योल धेरै समय नरहने विश्वास व्यक्त गर्नुभयो।
पछिल्ला दिनहरूमा प्रदेश सरकारमा नेपाली कांग्रेस र एमालेबीचको सत्ता सहकार्य टुट्ने तथा नयाँ राजनीतिक समीकरण बन्ने चर्चा भइरहेका बेला अध्यक्ष ओलीको यो अभिव्यक्ति आएको हो। एमालेले केही प्रदेशमा सरकारबाट बाहिरिने निर्णय गरिसकेको छ भने नयाँ वाम समीकरणबारे पनि राजनीतिक छलफल तीव्र बनेको छ।
अध्यक्ष ओलीले संघीय सरकारलाई सही दिशामा अघि बढाउन सबै राजनीतिक दलबीच आवश्यक समन्वय र सहकार्य हुनुपर्ने धारणा पनि व्यक्त गर्नुभयो।
प्रतिक्रिया