काठमाडौं, १८ वैशाख । काठमाडौंको बल्खु क्षेत्रमा सुकुम्बासी बस्ती हटाउने क्रममा भएको डोजर अभियानपछि एक दुःखद घटना सार्वजनिक भएको छ। घर भत्किएको दृश्य सहन नसकेर हिँडेका ६१ वर्षीय इन्द्रबहादुर राई बल्खु खोलामा मृत अवस्थामा फेला परेका छन्।
प्राप्त जानकारीअनुसार, शुक्रबार बिहान प्रशासनले सार्वजनिक जग्गा अतिक्रमण हटाउने क्रममा डोजर चलाउँदा राईको घरसमेत भत्किएको थियो। घर भत्किएको दृश्य ‘हेर्न सक्दिनँ’ भन्दै उनी त्यहाँबाट हिँडेका थिए।
उहाँको शव सोही दिन दिउँसो बल्खु खोलाको किनारमा फेला परेको प्रहरीले जनाएको छ। प्रारम्भिक जानकारीअनुसार उहाँले खोलामा हाम फालेर आत्महत्या गरेको आशंका गरिएको छ, यद्यपि घटनाबारे थप अनुसन्धान भइरहेको प्रहरीले जनाएको छ।
मृतक राई खोटाङका स्थायी बासिन्दा हुनुहुन्थ्यो र विगत केही वर्षदेखि बल्खु फलफूल तथा तरकारी बजार क्षेत्रमा श्रमिकका रूपमा काम गर्दै आउनुभएको थियो।
उहाँकी पत्नी सरिता राईका अनुसार बिहान घर भत्किएको देखेपछि उहाँ अत्यन्तै विचलित हुनुभएको थियो। “हेर्नै सकिनँ भन्दै हिँड्नुभएको थियो,” उहाँले बताउनुभयो।
स्थानीय बासिन्दाले पनि डोजरले बस्ती भत्काएपछि सुकुम्बासीहरूमा गहिरो मानसिक तनाव देखिएको बताएका छन्। घर गुमाउने पीडाले प्रभावित धेरै परिवार अहिले अस्थायी आश्रयमा बस्न बाध्य छन्।
यस घटनाले सुकुम्बासी व्यवस्थापनको प्रक्रियामा मानवीय संवेदनशीलता र उचित पुनर्वासको आवश्यकता पुनः उठाएको छ।
प्रतिक्रिया