काठमाडौं, ३१ असोज । प्रधानमन्त्री बालेन शाहले बडादसैँले विश्वभर छरिएर रहेका नेपालीलाई एकताबद्ध गर्दै सबैको घरमा उत्सव, उमङ्ग र आत्मीयता ल्याउने विश्वास व्यक्त गर्नुभएको छ।
शनिबार सामाजिक सञ्जालमार्फत दसैँको शुभकामना दिँदै उहाँले यस पर्वले सत्यको बाटोमा हिँड्न र सुशासन कायम गर्न सबैलाई प्रेरणा मिलोस् भन्ने कामना गर्नुभएको छ।
प्रधानमन्त्री शाहले दसैँलाई एकता, आत्मीयता र पारिवारिक मिलनको सङ्गमका रूपमा व्याख्या गर्दै सानालाई माया र ठूलालाई आदर गर्ने नेपाली मौलिक परम्पराको प्रतीक रहेको बताउनुभएको छ। विभिन्न विपत्ति र सङ्कटका बाबजुद नेपालीले धार्मिक, सांस्कृतिक तथा सामाजिक मूल्यमान्यताको संरक्षण गर्दै चाडपर्व मनाउँदै आएको उहाँको भनाइ छ।
यस वर्ष रसुवा, नुवाकोट र गोरखालगायतका स्थानमा भएका विनाशकारी घटनाको पीडा कायमै रहेको उल्लेख गर्दै प्रधानमन्त्री शाहले ज्यान गुमाएकाहरूप्रति श्रद्धाञ्जली, घाइतेको शीघ्र स्वास्थ्यलाभको कामना तथा शोकसन्तप्त परिवारप्रति समवेदना व्यक्त गर्नुभएको छ। विस्थापित नागरिकको पुनःस्थापनाका लागि सरकारले काम गरिरहेको जानकारी पनि उहाँले दिनुभएको छ।
दसैँ असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीक भएको उल्लेख गर्दै उहाँले काम, क्रोध, लोभ, ईर्ष्या र अहङ्कारजस्ता खराब प्रवृत्तिमाथि विजय प्राप्त गर्न सबैलाई आग्रह गर्नुभएको छ।
चाडपर्वका बेला पनि बाध्यताले विदेशमा रहनुपर्ने नेपालीको अवस्थाप्रति चिन्ता व्यक्त गर्दै प्रधानमन्त्री शाहले आर्थिक समृद्धि र नागरिकको सुखद जीविकाका लागि सरकार प्रतिबद्ध रहेको बताउनुभएको छ। आर्थिक अभावका कारण दसैँजस्तो महान् पर्व कसैका लागि बोझ बन्न नहुने उहाँको भनाइ छ।
देशलाई सुशासनको मार्गमा अघि बढाउन सरकार निरन्तर काम गरिरहेको उल्लेख गर्दै प्रधानमन्त्री शाहले माता दुर्गाभवानीको कृपा र प्रेरणाले सबैलाई सत्य तथा सुशासनको बाटोमा हिँड्ने शक्ति मिलोस् भन्ने कामना गर्नुभएको छ। उहाँले सबै नेपालीको आरोग्य, सुख, शान्ति र समृद्धिको कामना गर्दै सभ्य र भव्य रूपमा दसैँ मनाउन आग्रह गर्नुभएको छ।
प्रतिक्रिया