अध्यक्ष ओलीको सन्देशः जलेका सपनालाई जागृत गर्दै नयाँ पुस्ताको सुन्दर भविष्य बनाउन मिलेर अगाडि बढौं

काठमाडौं, ६ माघ । नेकपा एमालेका अध्यक्ष केपी शर्मा ओलीले सुन्दर भविष्य निर्माण गर्ने सपनाको रोपाइँ आजबाट सुरु हुन लागेको बताउनुभएको छ। प्रतिनिधि सभाको निर्वाचनका लागि उम्मेदवारी मनोनयनको दिन बिहानै उहाँले झापाबाट हराएका र भत्किएका सपनाहरूलाई फेरि जगाउँदै सुन्दर भविष्य निर्माण अघि बढ्नुपर्ने बताउनुभएको हो ।

ओलीले सामाजिक सञ्जालमार्फत भन्नुभएको छ, ‘हाम्रो लागि आज एक विशेष दिन हो। हराएका र भत्किएका सपनाहरूलाई फेरि जगाउँदै, सुन्दर भविष्य निर्माण गर्ने सपनाको रोपाइँ आजबाट सुरु हुँदैछ।’ उहाँले नेपाली र नेपालले जित्ने विश्वास व्यक्त गर्नुभयो। उहाँले जलेका सपनाहरूलाई फेरि जागृत गर्दै नयाँ पुस्ताको सुन्दर भविष्य साकार बनाउने यात्रामा मिलेर अगाडि बढ्न आग्रह गर्नुभएको छ ।

पूर्वप्रधानमन्त्री ओलीले भन्नुभयो , ‘हामीलाई पूरा विश्वास छ—हामी नेपालीले जित्ने छौँ, नेपालले जित्ने छ। जलेका सपनाहरूलाई फेरि जागृत गर्दै नयाँ पुस्ताको सुन्दर भविष्य साकार बनाउने छौँ। आउनुहोस्, यस यात्रामा हामी सबै मिलेर अगाडि बढौँ।’