१० किलाे गाँजासहित भारतीय नागरिक नियन्त्रणमा

कात्तिक । महोत्तरीको औरही नगरपालिका–१ स्थित औरही चोकमा प्रहरीले चेकजाँचका क्रममा ठुलो परिमाणको लागूऔषध बरामद गरेको छ । नियमित निगरानीका क्रममा उत्तरबाट दक्षिणतर्फ आइरहेको विआर ३० ए ०६०८ नम्बरको मोटरसाइकल रोकेर जाँच गर्दा १० केजी गाँजा फेला परेको प्रहरीले जनाएको छ ।

मोटरसाइकल चालक भारतको बिहार राज्य, वैशाली जिल्ला–५ पतेपुर निवासी २७ वर्षीय गोविन्द राम र पछाडि सवार २१ वर्षीय एकवाल मोहम्मदले बोकेको कालो झोलाभित्र प्लास्टिक र डोरीले कसेर लुकाइ राखिएको अवस्थामा दुई पोका गाँजा भेटिएपछि प्रहरीले तत्काल दुवैलाई नियन्त्रणमा लिएको हो ।

बरामद गरिएको गाँजा र पक्राउ परेकालाई आवश्यक अनुसन्धान तथा कानुनी प्रक्रिया अघि बढाउन इलाका प्रहरी कार्यालय गौशाला पठाइएको छ । प्रहरीले यो कारबाहीलाई क्षेत्रीय सुरक्षा सुदृढीकरण तथा लागूऔषध नियन्त्रण अभियानको निरन्तरता रहेको जनाएको छ ।