फेसबुकमा सिनियर अफिसरको तस्बिर राखेर ‘तिमीहरूले मलाई मारेउ’ लेखेका बैंकर मृत भेटिए

काठमाडौं, ५ जेठ । ग्लोबल आइएमइ बैंक विराटनगर शाखामा कार्यरत पिताम्बर खड्का बैंकका सिनियर अफिसरको तस्बिर सामाजिक सञ्जालमा पोष्ट गरेको केही समयपछि मृत फेला पर्नुभएको छ।

झापाको दमक नगरपालिका वडा नं ८ लक्ष्मीमार्ग टोलका ४२ वर्षीय बैंकर पिताम्बर खड्का घरमै मृत भेटिनुभएको हो । उहाँले मृत्यु हुनुअघि सोही बैकका सिनियर बैंकरहरुको तस्बिर राखेर ‘तिमीहरुले मलाई मारेका छौ’ लेख्नुभएको छ । उहाँले लेख्नुभएको छ ‘यु बास्टर्ड किल मी ।’

पिताम्बरले दिपचन्द्र रेग्मी, अनमिका कुँवर सिंह, सुरेन्द्र रेग्मी र सुमन पोखरेलको नाम समेत मेन्सन गर्नुभएको छ । उहाँहरु ग्लोबल आइएमई बैंकका सिनियर बैंकर हुनुहुन्थ्यो । खड्का यसअघि झापाको चारआलीस्थित ग्लोबल आइएमई बैंकमा कार्यरत हुनुहुन्थ्यो । उहाँ त्यसपछि विराटनगर शाखामा सरुवा भएका थिए ।

खड्का हिजो साँझ ५ बजेतिर मृत भेटिएको इलाका प्रहरी कार्यालय दमकले जनाएको छ । मृतकका बुबा महेश खड्काले छोरालाई झुण्डिएको अवस्थामा देखेपछि प्रहरीलाई खबर गरेका थिए । मृतकको शवलाई पोस्टमार्टमका लागि दमक अस्पताल पठाइएको छ । प्रहरीले घटनाको बिषयमा अनुसन्धान भइरहेको बताएको छ ।