काठमाडौं, १९ भदौ । भोटेकोशी नदीमा आएको विनाशकारी बाढीपछि जारी खोज तथा उद्धारका क्रममा हालसम्म १ हजार २९० जनाको शव फेला परेको नेपाल प्रहरीले जनाएको छ।
प्रहरीका अनुसार फेला परेका शवमध्ये ४२७ पुरुष, २५० महिला, ३४ बालक र ४५ बालिका छन्। त्यस्तै, ५३२ वटा मानव शरीरका आंशिक अंग फेला परेका छन् भने अस्पतालमा उपचारका क्रममा दुई जनाको मृत्यु भएको छ। फेला परेका शवमध्ये ९२६ वटाको व्यवस्थापन भइसकेको प्रहरीले जनाएको छ।
विपद्मा परी हालसम्म ४ हजार ७९८ जना बेपत्ता छन्। बेपत्ता हुनेमा २ हजार ८४७ नेपाली र ६०१ विदेशी नागरिक रहेका छन्। थप १ हजार ३५० जनाको अवस्थाबारे फोनमार्फत जानकारी प्राप्त भएको प्रहरीले जनाएको छ।
सुरक्षाकर्मीको सक्रियतामा हालसम्म ८ हजार १२७ जनाको उद्धार गरिएको छ। उद्धार गरिएकामध्ये ६ हजार ९० पुरुष र २ हजार ४७२ महिला रहेका छन्।
यसैगरी, फेला परेका शवमध्ये अझै १ हजार १४१ जनाको पहिचान हुन बाँकी रहेको छ। पहिचानका लागि प्रहरीले मृतकका १ हजार १४३ र आफन्तका ७१९ गरी कुल १ हजार ८६२ वटा डीएनए नमुना संकलन गरेको छ।
पहिचान हुन नसकेका शवको विवरण प्रहरीले आफ्नो वेबसाइटमा सार्वजनिक गरेको जनाएको छ।
प्रतिक्रिया