मधेशमा लोसपा, जसपा, माओवादीसहित ५ दलीय गठबन्धनको सहमति, को बन्ला मुख्यमन्त्री ?

जनकपुर, २९ असोज । मधेश प्रदेश सरकारको नेतृत्वका लागि दलहरुलाई आह्वान गरेपछि दलहरुबीच गठबन्धन हुने क्रम जारी रहेको छ । यस क्रममा हिजो मध्यरातसम्म बसेको विभिन्न दलहरुको बैठकले लोसपाको जितेन्द्र सोनललाई मुख्यमन्त्री बनाउन सहमति गरेको छ ।

जसपा नेपालका अध्यक्ष उपेन्द्र यादव र लोसपाका महन्त ठाकुरको उपस्थितिमा हिजो राति गठबन्धनबीच सहमति भएको हो । जनमत पार्टी पनि यसमा सहभागी हुने जनाइएको छ ।

नयाँ गठबन्धनमा लोसपा, जसपा नेपाल, नेकपा (माओवादी केन्द्र), नेकपा एस र जनमत पार्टी सहभागी रहेको जनाइएको छ । यो पाँच दलीय गठबन्धनमा ५६ जना सांसद रहेका छन् । उनीहरुले आजै सरकारको नेतृत्वका लागि दाबी पेश गर्ने तयारी गरेका छन् ।

यसअघि नेपाली कांग्रेसले आफ्नो नेतृत्वमा सरकार बनाउन एमाले र जनमतसहितको गठबन्धन सहमतिको पत्र प्रदेश प्रमुख कार्यालयमा बुझाएको थियो । हिजो जनमत पार्टी फुटेर जनस्वराज पार्टी अलग भएपछि केही असर परेको बुझिएको छ । सरकारको नेतृत्वका लागि आज ४ बजेसम्म दाबी पेश गर्न समय तोकिएको छ ।