दलित परिवारको घर तोडफोड गरेको आरोपमा वडा अध्यक्षसहित तीन जना पक्राउ

सिरहा । सिरहा जिल्लाको कल्याणपुर नगरपालिका–८, अरङ गाउँमा पाँच दलित परिवारको घर तोडफोड र लुटपाटको आरोपमा वडा अध्यक्ष रामकिशोर यादवसहित तीन जनालाई प्रहरीले पक्राउ गरेको छ । जिल्ला प्रहरी कार्यालय सिरहाका अनुसार पीडित दलित परिवारले दिएको उजुरीका आधारमा वडा अध्यक्ष यादवलाई नियन्त्रणमा लिइएको हो । पीडितले दिएको जाहेरीमा १३ जनालाई प्रतिवादी बनाइएको छ । उनीहरूमाथि आपराधिक उपद्रव अन्तर्गत मुद्दा दर्ता गरिएको प्रहरीले जनाएको छ । हालसम्म तीन जनालाई पक्राउ गरिएको र बाँकी अभियुक्तहरूको खोजी भइरहेको जिल्ला प्रहरी प्रमुख एवं प्रहरी उपरीक्षक (एसपी) अनन्तराम शर्माले जानकारी दिए ।

प्रत्यक्षदर्शीका अनुसार शुक्रबार साँझ करिब ५ बजेतिर ठुलो पोखरीको उत्तरपट्टी बसोबास गर्दै आएका दलित समुदायका पाँच परिवारमाथि योजनाबद्धरूपमा हमला गरिएको थियो । शोभित पासवान, विन्दे पासवान, अशोक पासवान, राजकुमार पासवान र रासलाल पासवानका घरमा तोडफोड र लुटपाट गरिएको हो । पीडित परिवारका अनुसार २०–२५ जनाको समूह आएर घरमा तोडफोड र लुटपाट गरेको थियो । प्रहरीकै सामु घटना भए पनि घर तोडफोड र लुटपाट गर्ने समूहलाई नियन्त्रणमा नलिएको पीडित परिवारले जनाएका छन् ।

घटनाको सुरुवात असोज १ गतेको विश्वकर्मा पूजाका दिन भएको विवादबाट सुरु भएको बताइन्छ । अरङ बजारमा आयोजित आर्केस्ट्रा कार्यक्रममा दलित समुदाय र प्रभाष सिंह समूहबिच विवाद भएको थियो । सो विवादकै प्रतिशोधस्वरूप यो हमला गरिएको पीडित र स्थानीयले आरोप लगाएका छन् । एसपी शर्माले भने, ‘अनुसन्धान जारी छ । थप संलग्न व्यक्तिहरू फेला परेमा कानुनी कारबाही अघि बढाइनेछ । सामाजिक सद्भावमा खलल पु¥याउने यस्ता आपराधिक गतिविधि सह्य हुँदैन ।’ पीडित अशोक पासवान आफ्नो घर नष्ट गरिएको र लत्ताकपडा समेत नरहेको बताउँछन् ।