काठमाडौं, ४ असोज । काठमाडौं मेडिकल कलेज (केएमसी)को विशेष प्राविधिक सहयोगमा ललितपुरको सानेपामा आयोजित बृहत् निःशुल्क स्वास्थ्य शिविरबाट १ हजार १२७ जनाले स्वास्थ्य सेवा लिएका छन् ।
रेडियन्ट बहुउद्देश्यीय सहकारी संस्थाको मुख्य आयोजनामा आइतबार बिहान ९ बजेदेखि दिउँसो ४ बजेसम्म रेडियन्ट रिडर्स एकेडेमीको प्राङ्गणमा शिविर सञ्चालन गरिएको हो। केएमसीका विशेषज्ञ चिकित्सकसहित २९ जनाको टोलीले जनरल मेडिसिन, स्त्रीरोग, जनरल सर्जरी, हाडजोर्नी तथा नसा रोग, नाक, कान तथा घाँटी, बालरोग, आँखा र दन्तरोगसम्बन्धी परीक्षण तथा उपचार सेवा प्रदान गरेका हुन ।
शिविरमा जनरल मेडिसिनतर्फ १६९, स्त्रीरोगतर्फ ६६, जनरल सर्जरीतर्फ ४१, हाडजोर्नी तथा नसा रोगतर्फ ८३, नाक, कान तथा घाँटीतर्फ १०१, बालरोगतर्फ ५२, आँखातर्फ १९६ र दन्तरोगतर्फ ९६ जनाले सेवा लिएका छन् । दन्तरोगतर्फ ६ जनाको दाँत निकालिएको थियो।
त्यस्तै, ८४ जनाको इसिजी र १०२ जनाको भिडियो एक्स–रे गरिएको थियो। प्रयोगशालातर्फ हेमोग्लोबिन, सुगर, युरिया, युरिक एसिड, ब्लड ग्रुप, युरिन आरई र प्रेग्नेन्सी टेस्टलगायत परीक्षणबाट १३९ जनाले निःशुल्क सेवा लिएका छन् ।
शिविरमा थप उपचार आवश्यक देखिएका १९ जनालाई काठमाडौं मेडिकल कलेजमा उपचारका लागि सिफारिस गरिएको छ। केएमसीले शिविरमा सहभागी भई थप परीक्षण वा उपचार आवश्यक पर्ने सेवाग्राहीलाई दुवाकोटस्थित अस्पतालमा असोज महिनाभर ५० प्रतिशत र त्यसपछि २५ प्रतिशत छुट उपलब्ध गराउने जनाएको छ। शिविरमा सहभागी सबैले यो सुविधा पाउने तथा रेडियन्ट बहुउद्देश्यीय सहकारीसँग संस्थागत समन्वयपछि सहकारीका सदस्यलाई थप विशेष सुविधा उपलब्ध गराइने जनाइएको छ।
केएमसीका शिविर संयोजक मदन श्रेष्ठले शिविर व्यवस्थित र योजनाबद्ध रूपमा सम्पन्न भएको बताउनुभयो। उहाँले शिविर आयोजना गर्ने रेडियन्ट बहुउद्देश्यीय सहकारी संस्थालाई धन्यवाद दिनुभयो।
सहकारीका व्यवस्थापक खगेन्द्र ढुंगानाले संस्थाको सामाजिक उत्तरदायित्वअन्तर्गत शिविर आयोजना गरिएको बताउनुभयो। उहाँले केएमसीका चिकित्सकसहितको टोलीले निःशुल्क स्वास्थ्य सेवा प्रदान गर्नुभएकोमा धन्यवाद व्यक्त गर्नुभयो।
शिविरमा रेडियन्ट बहुउद्देश्यीय सहकारीका शेयर सदस्य, स्थानीयवासी तथा रेडियन्ट रिडर्स एकेडेमीका विद्यार्थीले सेवा लिनुभएको थियो। एकेडेमीका शिक्षक तथा शिक्षिका, लायन्स क्लब अफ काठमाडौं निर्वाना र लियोका सदस्य स्वयंसेवकका रूपमा खटिनुभएको थियो। ग्लोबल कन्सल्ट प्रालि र लायन्स क्लब अफ काठमाडौं क्यापिटल सिटीले सहआयोजकका रूपमा सहयोग गरेका थिए।
प्रतिक्रिया