संसद्‌मा ऐन महरको कडा काउन्टर : ठेकेदारको कुन खुट्टा भाँच्ने, दाहिने कि देब्रे ?

काठमाडौं, ४ असार । नेकपा एमालेका प्रमुख सचेतक ऐन महरले पूर्वाधार विकास मन्त्री सुनिल लम्सालको विवादित अभिव्यक्तिबारे प्रश्न उठाउनुभएको छ । प्रतिनिधिसभामा बैठकमा बोल्दै उहाँले मन्त्री लम्सालले ठेकेदारको खुट्टा भाँच्ने भन्ने अभिव्यक्ति दिनु कानुनसम्मत थियो वा थिएन ? भन्दै प्रश्न गर्नुभयो ।

उहाँले प्रश्न गर्दै भन्नुभयो,‘माननीय मन्त्रीज्यूले ठेकेदारको खुट्टा भाँच्नु भन्ने आदेश दिनुभएको थियो । त्यो कानुनबमोजिम थियो कि थिएन ? कुन खुट्टा भाँच्ने हो, दाहिने कि देब्रे ? त्यो पनि स्पष्ट भएन, मन्त्रीको हैसियतबाट दिन मिल्ने खालको आदेश हो कि होइन ? ठेकेदारलाई मन्त्रालयमै बोलाएर धाकधम्की दिने, गाली गलौच गर्ने र थर्काउने कुरा कानुन बमोजिम थियो कि थिएन ?’

यसअघि केही दिनअघि नागढुंगा–मुग्लिन सडक खण्डको निरीक्षणका क्रममा पूर्वाधार विकास मन्त्री सुनिल लम्सालले काम नगर्ने ठेकेदारप्रति आक्रोश पोख्दै ‘काम गरेन भने खुट्टा भाँच्दिनू’ भन्ने निर्देशन दिनुभएको कुरा भाइरल भएको थियो ।

उहाँले सरकारको आगामी आर्थिक वर्षको बजेटमाथि पनि असन्तुष्टि जनाउनुभयो । दुर्गम तथा पिछडिएका क्षेत्रमा भौतिक पूर्वाधार विकासका लागि पर्याप्त बजेट विनियोजन नभएको आरोप लगाउनुभयो ।