मन्त्री लम्साललाई बासनाको तिखो प्रश्नबाण: ‘जिम्मेवारीमा बसेर भौतिक कारबाहीको धम्की दिने ?’

काठमाडौं, २ असार । नेपाली कांग्रेसकी प्रमुख सचेतक बासना थापाले संसदीय समिति प्रभावकारी रूपमा सञ्चालन भइरहे पनि समितिको गरिमा र संसद्को प्रतिष्ठा अपेक्षाअनुसार कायम हुन नसकेको बताउनुभएको छ ।

संसद् भवन परिसरमा सञ्चारकर्मीसँग कुरा गर्दै समितिमा मन्त्रीहरूको अनुपस्थिति र सांसदहरूले उठाएका प्रश्नको पर्याप्त जवाफ नपाइने अवस्थाप्रति असन्तुष्टि व्यक्त गर्नुभयो । सांसदहरूले बारम्बार विभिन्न विषय उठाए पनि सम्बन्धित मन्त्रीहरूबाट अपेक्षित जवाफ नआएको बताउनुभयो ।

दुई तिहाइको जनादेशसहित गठन भएको सरकारले पुरानै बजेटलाई सामान्य परिमार्जन मात्र गरेको जस्तो देखिएको टिप्पणी गर्नुभयो । स्वास्थ्य, शिक्षा र पूर्वाधार क्षेत्रका बजेट सहर केन्द्रित भएको भन्दै ग्रामीण तथा दुर्गम क्षेत्रका आवश्यकतालाई पर्याप्त सम्बोधन गर्न नसकेको बताउनुभयो ।

उहाँले भौतिक पूर्वाधार तथा यातायात मन्त्री सुनिल लम्सालले ठेकेदारको खुट्टा भाँचिदिनू भन्ने अभिव्यक्ति दिनु गैरजिम्मेवार भएको बताउनुभयो । उक्त अभिव्यक्ति आवेगमा आएको हो वा होइन भन्नेबारे मन्त्रीसँग प्रत्यक्ष रूपमा स्पष्टीकरण लिन चाहेको उहाँले बताउनुभयो ।

उहाँले भन्नुभयो,‘उहाँको गैर जिम्मेवारी अभिव्यक्ति आएको छ । ठेकेदारलाई काम गर्ने वातावरण बनाएर उहाँहरूलाई बोलाएर कानुन सम्मत अगाडि बढ्ने हो किरु एकैचोटि भौतिक कारबाही गर्छु भन्ने ? यो किन बोल्नुभयो ? अस्ति एकथरीले प्रधानमन्त्रीको टङ स्लिप भएको भन्नुभएको छ । उहाँको पनि त्यस्तै हो कि ?’