काठमाडौं, १४ मंसिर । नेकपा एमालेको एघारौँ महाधिवेशनका लागि कञ्चनपुरका तीन वटै निर्वाचन क्षेत्रबाट कतै सर्वसम्मत रुपमा प्रतिनिधि छनोट गरिएको छ भने कही निर्वाचन गरेर प्रतिनिधि छनोट गरिएका छन् । कुनैमा सर्वसम्मत रुपमा प्रतिनिधि छनोट गरिएको छ भने केही क्षेत्रमा निर्वाचन गरेर छनोट गरिएको नेकपा एमालेका जिल्ला उपाध्यक्ष तथा प्रचार विभाग प्रमुख जनकराज अवस्थीले बताउनुभयो ।
उहाँका अनुसार, कञ्चनपुर निर्वाचन क्षेत्र नम्बर १ बाट खुला सदस्यतर्फ ४९८ मतसहित पल्लबराज भट्ट र ६३९ मतसहित वीरबहादुर थापा निर्वाचित हुनुभएको छ । यसैगरी, महिलातर्फ कमला चौधरी ५१७ मत र कल्पना गिरी ५१४ मतसहित निर्वाचित हुनुभएको हो । साथै, युवा तर्फबाट काशीराम बोहरा ५२१ मतसहित महाधिवेशन प्रतिनिधिका लागि छनोट हुनुभएको छ । शनिबार भएको मतदानमा निर्वाचन क्षेत्र नम्बर एकबाट एक हजार ६० मत खसेको थियो ।
यसैगरी, निर्वाचन क्षेत्र नम्बर दुईमा भने पाँच जना महाधिवेशन प्रतिनिधि सर्वसम्मत रुपमा छनोट गरिएको थियो । जहाँ खुला सदस्यका लागि रणबहादुर महरा र वचनबहादुर सिंह सर्वसम्मत छनोट हुनुभएको हो । महिलातर्फ लक्ष्मी बुढा र पार्वती जोशी सर्वसम्मत चयन भएका थिए भने युवा तर्फबाट पनि प्रविन बोगटी चयन हुनुभएको थियो ।
यसैगरी, निर्वाचन क्षेत्र नम्बर ३ बाट खुला सदस्यतर्फ डा। दीपक प्रकाश भट्ट ५६७ मत र जनकराज अवस्थी ३३७ मतसहित निर्वाचित हुनुभएको छ । खुला सदस्यका लागि चार जनाको उम्मेदवारी परेको थियो । जसमध्ये महेश राज पन्तले ३०७ मत र विष्णु कणेँलले २९५ मत प्राप्त गर्नुभएको थियो ।
यसैगरी, दलित तर्फबाट प्रतिनिधि छनोटका लागि चार जनाबिच भएको प्रतिस्पर्धामा आरपी सार्की १७२ मत सहित निर्वाचित हुनुभएको छ । यसैगरी, युवा तर्फ ३५१ मतसहित ओम बस्नेत निर्वाचित हुनुभएको छ । तीन उम्मेदवारबिच भएको प्रतिस्पर्धामा नरेन्द्र कार्कीले २५८ र केशव चन्दले १६४ मत प्राप्त गर्नुभएको थियो ।
प्रतिनिधि छनोटका लागि मङ्सिर ११ गते मनोनयन दर्ता गरिएको थियो । नेकपा एमालेले काठमाडौँमा यही मङ्सिर २७ देखि २९ गते सम्म पार्टीको ११ औँ महाधिवेशन आयोजना गरेको छ ।
प्रतिक्रिया