सिंहदरबार आगजनीका आरोपी महेन्द्र गौतमविरूद्ध मुद्दा चलाइने

काठमाडौं, १७ फागुन। सिंहदरबार आगजनीको आरोपमा पक्राउ परेका महेन्द्र गौतमलाई मुद्दा नचलाउने जिल्ला सरकारी वकिल कार्यालय काठमाडौंको निर्णय उच्च सरकारी वकिल कार्यालय पाटनले बदर गरेको छ ।

उच्च सरकारी वकिलको कार्यालयले गौतममाथि अनुसन्धान गरी हदम्यादभित्रै मुद्दा दायर गर्न भनेको छ । जिल्ला सरकारी वकिल कार्यालय काठमाडौंले गत भदौ २४ को जेन-जी प्रदर्शनका क्रममा सिंहदरबार आगजनी गरेको आरोपमा पक्राउ परेका गौतमलाई मुद्दा चलाउने आधार नदेखिएको भन्दै मुद्दा नचलाउन सिफारिस गरेको थियो ।

जिल्ला सरकारी वकिल कार्यालयको यो निर्णय विवादित भएको थियो । माघ २२ गते पक्राउ परेका गौतमलाई मुद्दा चलाउने प्रमाण र आधार नभेटिएको भन्दै जिल्ला सरकारी वकिल कार्यालय काठमाडौंले यही फागुन ८ गते थुनामुक्त गर्ने भनी प्रहरीलाई पनि पत्र लेखेको थियो ।

सरकारी कार्यालय जलाएको आरोप आफैंले स्वीकार गरेको व्यक्तिलाई मुद्दा चलाउनुपर्नेमा अभियोजन नै नगर्ने निर्णय गर्नु गलत फौजदारी अभ्यास हुने भनि आलोचना भएको थियो । जिल्ला सरकारी वकिल कार्यालय काठमाडौंका प्रमुख रामहरि काफ्लेले गौतमको हकमा उच्च सरकारी वकिल कार्यालयले मुद्दा चलाउनु भनेकाले अब जिल्ला अदालतमा मुद्दा दर्ता गरिने बताउनुभयो ।