‘केपी ओली विरोध गर्नुपर्ने कामै गर्दैन, हिजोदेखि गुट पनि सकियो’

काठमाडौं, ४ पुस । नेकपा एमालेका अध्यक्ष केपी ओलीले आफूले पार्टीभित्र विरोध गर्नुपर्ने कुनै कामै नगर्ने जिकिर गरेका छन् । केन्द्रीय समिति बैठकलाई सम्बोधन गर्दै विरोधीहरूले ओलीको विरुद्ध बोल्नै पाइँदैन भनेर उल्क्याउन गरेको बताउनुभयो । उहाँले प्यानल बनाएर चुनाव लडेको भएपनि हिजोबाट गुट सकिएको बताउनुभयो ।

ओलीको भनाइ 
हाम्रो पार्टी महान अभिभारा बोकेको छ । त्यत्तिकै दृढ अनुशासन र अनुशासन, विचार र अनुशासनमा बाँधिएको एकताका साथ हामी अगाडि बढ्छौै । उल्क्याउँछन् त्यहाँ त कोही बोल्नै पाउँदैन, एमालेमा कोही बोल्नै पाउँदैन, त्यहाँ केपी ओलीको अधिनायकवाद चल्छ, तानाशाही चल्छ, कसैले आँखामा आँखा जुधाएर बोल्नै सक्दैन, हेर्नै सक्दैन यस्ता हल्ला चलाउँछन् ।

आलोचनात्मक चेत हराएका झोलेहरू एमालेमा बस्छन् यस्ता कुरा गर्छन् । नत्र ती विरोधमा बोलिहाल्थे नि, खै केपी ओलीको विरोधमा बोलेका ? केपी ओलीले विरोध गर्नुपर्ने कुनै कामै गर्दैन त के भनेर विरोध गर्ने ? उनीहरूले त्यसो भन्छन् ।

लिडरसिपप्रति अनास्था जगाउनका लागि, पार्टी एकतामा खलल पुर्‍याउनका लागि त्यस्ता उचाल्ने कुराहरू गर्छन् । यस्ता कुराहरूबाट हामी प्रभावित हुनु हुँदैन । यसतर्फको आवाज बोकेर पनि प्रतिनिधि आएका छन् भन्ने हल्ला चलाउँछन् ।

हिजो चुनावमा लड्दा प्यानल भएर पनि लडियो होला । स्वतन्त्र भएर पनि लडियो होला । कुन प्यानल भयो, कुन स्वतन्त्र भयो, के भयो, त्यो हिजो नै परिणाम आउनसँगै सिद्धियो । अब एमालेको केन्द्रीय कमिटी, केन्द्रीय कमिटीमा हामी छौँ र यो केन्द्रीय कमिटी यो प्यानल र त्यो प्यानल होइन, एमालेको देश हाँक्ने केन्द्रीय कमिटी हो, यो एकजुट छ, एकढिक्का छ । यो पक्ष छैन, उ पक्ष छैन, यो प्यानल छैन, उ प्यानल छैन ।

यही भावना र दृढताका साथ हामी अगाडि बढ्छौँ । देश अप्ठ्यारो अवस्थामा छ । यो अप्ठ्यारो अवस्थालाई सजिलो अवस्थामा पुर्याउने अभिभारा हाम्रो पार्टीको काँधमा छ ।