काठमाडौं, ११ साउन । द्विपक्षीय द्वन्द्व समाधानमा मलेशियाको मध्यस्थता स्वीकार गर्न कम्बोडिया र थाइल्याण्ड तयार भएका छन् । मलेशियाको विदेश मन्त्रालयले आइतबार यसबारे जानकारी दिएको हो ।
वार्ताका लागि कम्बोडियाका प्रधानमन्त्री हुन मनेट र थाइल्याण्डका कार्यवाहक प्रधानमन्त्री फुमथाम वेचायाचाईले सोमबार बिहान मलेशियाको राजधानी क्वालालम्पुर भ्रमण गर्ने अपेक्षा गरिएको छ । मलेशियाको विदेशमन्त्री मोहमद हसनले राज्यसञ्चालित समाचार संस्था बेर्नामालाई बताएअनुसार दुबै मुलुक मलेशियाली मध्यस्थता स्वीकार गर्न तयार भएका हुन् ।
यस द्वन्द्व समाधानका लागि अर्को कुनै पनि देशलाई संलग्न गराउन नहुनेमा दुबै मुलुक एकमत रहेको उनको भनाइ छ ।
समाचार संस्था रोयटर्सका अनुसार यसअघि गत शुक्रबार मलेशियाका प्रधानमन्त्री अनवर इब्राहिमले दुबै मुलुकसमक्ष मध्यस्थताको प्रस्ताव गरेका थिए ।
हाल मलेशियाले दक्षिणपूर्वी एशियाली मुलुकहरुको संगठन आशियानको अध्यक्षता गरिरहेको छ ।
शनिबारमात्रै अमेरिकी राष्ट्रपति डोनाल्ड ट्रम्पले पनि दुबै मुलुकका नेताहरु युद्धविरामका लागि सहमत भएको दाबी गरेका थिए ।
गत बिहीबारदेखि थाइल्याण्ड र कम्बोडियाबीच सैन्य झडप जारी छ । द्वन्द्वका क्रममा हालसम्म दुबै मुलुकमा गरी ३० जनाभन्दा धेरैको ज्यान गइसकेको छ भने २ लाखभन्दा धेरै घाइते भएका छन् ।
प्रतिक्रिया